كيف تطلبين اون لاين ؟!
من المواقع الامريكية او الاوربية او الصينية او من اي مكان بالعالم .. هالشيء صاير مره مفيد ويوفر لك لان فيه مبالغة بالاسعار او حتى تظهرين مميزة بقطعك واسلوبك ..
التدوينة اليوم بشرح فيها كيف اشتري اون لاين وتجربتي مع الشراء الاون لاين وبفتح صفحة قريب واضمنها تجاربي السابقة والجاية ان شاء الله  عشان تستفيدون اكثر




ايش الاشياء اللي احتاجها بالطلب ؟!!

1- كريدت كارد " فيزا"  او فيزا تسوق من "الراجحي" وانا ارشح فيزا التسوق من الراجحي لان رسومها بسيطة والشيء الاحلى انك تعبيها بالمبلغ اللي تحتاجينه من مباشر للافراد وبكذا تضمنين فلوسك ما تنسرق او تطير !!


2- الشيء الثاني صندوق البريد الامريكي فيه اكثر من شركة بس انا اخترت would ship - هنا رابط الموقع ws1.c بعدها سجلي مستخدم جديد وسجلي بياناتك صح !!



هذي الواجهة للورلد شيب - اي شيء مو واضح اكتبوا لي بالكومنت او ايميل

طبعاً فيه رسوم بس اغلب الرسوم بالتسجيل لاول مره بس 


3- اللغة الانجليزية مهمه لما تطلبين من المواقع عشان تكونين عارفة الخامات والقطع وبعد لما يرسلون لك ايميل او كيف تعرفين تسوين تشك اوت وتشحنينها يعني مهمه بالتواصل مو لازم تكونين متقنة للغة يكفي الاساسيات والبحث بالكلمات اللي فعلا تحتاجينها وتخص الفاشون والبيوتي ..

تقريباً هذي الاشياء المهمة

طرق تحويل العملات ؟!

ـ بالنسبة لتحويل العملة ممكن للدولار تضربين في ٣.٧٥ لكن الافضل تحولين بهذا الموقع oanda.com لان سعر الصرف يرتفع وينخفض انا احب استخدمه 

طيب كيف اعرف متى موعد وصول الشحنة بعد ما تسوين تشك اوت راح يرسلون لك ايميل وفيه خط تتبع الشحنه تشوفين وين راحة لين توصلك بعدها بيتصل مكتب الشحن او ممكن يوصلونها اذا كنتي مشتركة معهم 

كيف يكون الشحن دايركت وليه نستخدم صندوق البريد الامريكي ؟!

 فيه بعض المواقع تشحن للسعودية بدون صندوق شحن امريكي وبكذا ما تحتاجين صندوق بريد امريكي لكن ليه افضل صندوق الشحن الامريكي غالبا لما اشتري اشتري من اكثر من موقع وفيه هالميزه ان يجمع الشحنات ويعيد تغليفها واذا اخترت التخلص مثلا من كراتين الشوزات ينزل من وزن الشحنه وبكذا توفرين فلوسك .




بالنسبه لايش الممنوع بالشحن او حتى اذا اشتريتيه بيكلف عليك !!
المناكير والعطور والحبوب الغير مرخصه ممكن تتلفها شركة الشحن اذا كانت مخالفة وممنوعه بالشحن الجوي مو مضمونه انك تدفعين وتروح عليك اشوف من الافضل تشترينها من هنا او اذا لك قرايب يجبونها معهم مع هذا لازم تنتبهين للحجم للعطور كم مسموح بالمطار وتتاكدون من الاشياء الممنوعه بشركة الشحن .

هذي الاساسيات اذا طبقتيها مبروك عليك الوناسه وتجريب الشعور اللي البنات كلهم يحبونه تشترين اللي تبين من البيت بدون حوسه ولف بالاسواق وبالاخير ما يعجبك شيء .. واكيد بالبداية ممكن تواجهين مشاكل وتتعرقلين لكن بتتعلمين مع الوقت

احبكم